Өңірлер

ОҚО әкімі аймақтың елді мекендерін ауыз сумен қамтамасыз ету жағдайын Қазақстан Президентіне жеткізді

ОҚО әкімі А. Мырзахметов өз хатында облыстың елді мекендерін ауыз сумен қамтамасыз етуге байланысты Үкіметтің кеңейтілген отырысында Мемлекет басшысы берген тапсырманың орындалу барысы туралы жеткізді, деп Ақорданың баспасөз қызметі хабарлады.
Оңтүстік Қазақстан16 Тамыз , 16:19

Әкім өңірде 2,7 миллион адам тұратын 929 елді мекенді сумен қамтамасыз ету жөнінде жүйелі әрі тұрақты жұмыс жүргізіліп жатқанын баяндаған.

Атап айтқанда, соңғы 5 жылда 253 елді мекенде тұратын 873 мың тұрғын ауыз сумен қамтамасыз етілген. Нәтижесінде су құбырымен қамтылған елді мекендер саны 412-ден (44,3%) 665-ке (71,6%) дейін, ал суға қолы жеткен тұрғындар саны 1,4 миллионнан (56%) 2,3 миллионға (85,1%) дейін өскен.

Сонымен қатар, хабарланғандай, Асар-Қайнарбұлақ суаққысы бүгінгі таңда сусорғы қондырғыларымен толық жабдықталды және 16 шақырым су құбыры мен 10,5 шақырым коллектордың құрылысы аяқталып, елді мекеннің ішкі тораптарына қосу жұмыстары жүргізілуде. Нысанды биылғы 15 қазанда пайдалануға беру жоспарлануда. Оның мерзімін кешіктірген кінәлі тұлғалар жұмыстан босатылған. Өз міндеттемелерін бұзған мердігерге тиісті шара қолданылған.

Сондай-ақ, Сарыағаш ауданының Ынтымақ ауылын ауыз сумен қамтамасыз ету мәселесі қыркүйек айында шешілетіні айтылған. 

Соңында өңір басшысы халықты ауыз сумен қамтамасыз ету әлеуметтік маңызды бағыт екенін және онымен байланысты Мемлекет басшысының тапсырмаларын орындау үшін қажетті жұмыстардың бәрі жалғастырылатынын атап өткен.




Яндекс.Метрика